భారత్ - పాక్ యుద్ధం... ఆంధ్ర యూనివర్శిటీలో హాస్టళ్ల మూసివేత

ఉద్రిక్తతల నేపథ్యంలో కీలక నిర్ణయం తీసుకున్న ఏయూ యాజమాన్యం ఈరోజు నుంచి హాస్టళ్లను తాత్కాళికంగా మూసివేస్తున్నట్టు ప్రకటన నీటి ఎద్దడి, మరమ్మతు పనులను కూడా కారణాలుగా చెప్పిన యాజమాన్యం భారత్, పాకిస్థాన్ మధ్య నెలకొన్న తీవ్ర ఉద్రిక్త పరిస్థితుల నేపథ్యంలో విద్యార్థుల భద్రతకు అత్యంత ప్రాధాన్యతనిస్తూ విశాఖపట్నంలోని ఆంధ్రా విశ్వవిద్యాలయం (ఏయూ) కీలక నిర్ణయం తీసుకుంది. ఈరోజు నుంచి వర్సిటీ పరిధిలోని అన్ని విద్యార్థి వసతి గృహాలను తాత్కాలికంగా మూసివేస్తున్నట్లు యూనివర్సిటీ అధికారులు ప్రకటించారు. సరిహద్దుల్లో ఉద్రిక్తతలు కొనసాగుతున్నందున, ముందుజాగ్రత్త చర్యగా ఈ నిర్ణయం తీసుకున్నట్లు తెలుస్తోంది. పరీక్షలు ఇప్పటికే పూర్తయిన విద్యార్థులు తక్షణమే తమ వసతి గృహాలను ఖాళీ చేసి, వారి స్వస్థలాలకు సురక్షితంగా చేరుకోవాలని యూనివర్సిటీ యాజమాన్యం స్పష్టమైన ఆదేశాలు జారీ చేసింది. విద్యార్థుల సంక్షేమం, భద్రత తమ ప్రథమ కర్తవ్యమని అధికారులు పేర్కొన్నారు. ప్రధానంగా భద్రతా కారణాలతో పాటు, వసతి గృహాల్లో నెలకొన్న నీటి ఎద్దడి సమస్య, వార్షిక మరమ్మతు పనుల నిర్వహణ కూడా ఈ మూసివేతకు ఇతర కారణాలుగా ఆంధ్రా యూనివర్సిటీ రిజిస్ట్రార్ అధికారిక ప్రకటనలో తెలిపారు. ఈ సమయంలో హాస్టళ్లలో అవసరమైన మరమ్మతులు చేపట్టి, నీటి సరఫరా వ్యవస్థను మెరుగుపరిచేందుకు కూడా చర్యలు తీసుకోనున్నట్లు సమాచారం. పరిస్థితులు చక్కబడిన తర్వాత హాస్టళ్ల పునఃప్రారంభంపై తదుపరి ప్రకటన వెలువడుతుందని అధికారులు సూచించారు.